1Ti 4 | MCQ | STEP | 'Enakaivo Godoni 'Avenijara samaumai ijá 'waramana. Vea túchamaa ijaho ea 'aho'a puni nimairoa are'i kaivo va'e 'avena ka'ene pisimisavi'ini jihipuni vu'a ataa apúsame hehune 'ee 'avena sisei jihipuni tamaniji vehuna.

1 Timothy 4

Najahi'ina Ira Asinijina

1 'Enakaivo Godoni 'Avenijara samaumai ijá 'waramana. Vea túchamaa ijaho ea 'aho'a puni nimairoa are'i kaivo va'e 'avena ka'ene pisimisavi'ini jihipuni vu'a ataa apúsame hehune 'ee 'avena sisei jihipuni tamaniji vehuna. 2 Pura 'unama ira'ata ka'ene najahujipo veju'e puni vwiha ijaho areri ajania'e veni jae sirirame pijihu'e swirasahu ja'ina'e rejura. 3 'Ene pu tanu'urihe panapasi nehuna 'warame 'ee 'iruma 'aho'a paihuna'e 'waravura. 'Enakaivo ijija Godira venarena ea ka'ene nimaiji hena kame nimaa rojujipo teamana'eje vajúsarame ine hinohuna'e venana. 4 Ijihuni maijaho uneunecha mapoka ka'ene Godira venajija mamaaruna. 'Ena'omo unenu'u 'aho'a pasenuhuna kaivo teimani roji'i 'ekahuna. 5 Ijihuni maijaho Godoni Ira 'ee siporuijara venaume marasahara.

Jesu Keriso Oni Pwea Mamaa Ijihina

6 A ikihi rone vwehu nuna naja'amajaho a Jesu Keriso oni pwea mamaa'e rehuna. 7 'Ene na'ia mapoka'e nimaaroa 'ee vu'a mamaa ka'ene ara 'ararihae roajihuni 'ahi hina rouni eiji rehuna. 8 Hahake 'ajo'arahuna manura piravu jihipuni eha ijaho ma'u'ua kaivo Godira ura renuja'ina'e uneunecha mapoka manura piravujija iviamaa kehuni hia 'ee hia ka'ene nahama 'waruvara 'ee hia ka'ene túna'i hihunijaho ni'ima'ura'e ni'ajihuna. 9 Ikaho vu'a nimaa ka'ene nú ea maho'o apehunijina. 10 Ijihuni maijaho nú ikehuni hahi kaukara harura vene haha heju. Ijihuni maijaho núni nimaa roijaho Godi ka'ene majama hiji'ina ka'ene ea maho'o puni Ni'ajihi'ini jihuni toi namu. 'Enavo Hu nimaa hu ea ka'ene nimaa roji'ina kehipuni Ni'ajúhi'ina. 11 Ike vu'a ikija ira kisina'e 'warame naja'amana. 12 'Ene veje a ea maiu'ini jihuna'e a túa paveta'avara. 'Enakaivo ara vu'a 'waramuna 'ee onuna 'ee oja mihuna 'ee nimaa ronuna 'ee arira maa ka'ene venujara ea ka'ene nimaa roji'inijija najahakame pu 'u'o ija'ina ve'avara. 13 Oni oja vwiha iji'i ea rira Godoni vu'a tahe hami ni'ajihe 'ee najahi'i hi'eje na iji'a vuuta. 14 Godoni 'Aveni jihuni swara ka'ene oni vaji namuna ka'ene erutaepo puni ija oni toi irechavi'i poropeti puni ira ka'ene 'waravajaho paka'eje aremuroama. 15 Ike uneunecha kija teamana'eje veje oni pwinana'e re'avara. 'Ejakame ara mamaa ka'ene venujaho ea ka'avara. 16 A oni hia orono hami 'ajo'amana 'ee hami kivi'i najahe 'ee 'unama iraka ka'ene nimaijiru ve'amana. Ijihuni maijaho a ija'ina'e ve'amajaho a orono ni'ajarame 'ee ea ka'ene oni vu'a hejujija ni'ajihe avahuna.